Sekreterê Giştî yê NATOyê Mark Rutte daxuyand ku biryara Partiya Karkerên Kurdistanê (PKK) ya xwefesixkirin û danîna çekan “gavekî bi pêşketî yê girîng” e. Rutte diyar kir ku bi Serokkomarê Tirkiyeyê Recep Tayyip Erdogan re li ser vê yekê li hev kirine ku ev gav “derfeteke mezin” e.

SERHAT NEWS  – Rutte, li paytexta Belçîkayê Brukselê, beriya civîna Wezîrên Karên Derve yê Yekîtiya Ewropayê ya taybet a li ser mijara parastinê, di konferanseke rojnamevanî de axivî. Wî got: “Bêguman ev gaveke pir girîng e. Daxuyaniya PKKê ya derbarê danîna çekan de, bê şik daxuyaniyeke bi bandor e.”

PKK di 12ê Gulana îsal de ragihandibû ku di navbera 5-7ê heman mehê de kongreya xwe ya 12emîn li dar xistiye û di wê kongreyê de biryara danîna çekan û xwefesixkirinê wergirtiye. Rutte anî ziman ku hefteya borî wî Erdogan ziyaret kiriye û her du alî li ser vê yekê li hev kirine ku ev biryar derfeteke girîng e. Wî wiha dewam kir: “Em bi hemû aliyên pêwendîdar re ji nêzîk ve destpêkirina diyalogê dişopînin.”

Her wiha, di 27ê Sibata 2025an de, rêberê girtî yê PKKê Abdullah Ocalan bi rêya Heyeta Îmraliyê bangawaziyek kiribû û daxwaz ji PKKê kiribû ku çekan deyne û xwe fesix bike.