Li Stenbolê, karkerên înşeatê ku muçeyên xwe nagirin çalakî li dar xistin. Polîsan mudaxale li çalakiyê kir û namzeta parlamenteriyê ya Partiya Çepên Kesk Kezban Konukçu û 15 karker hatin desteserkirin.
Karkerên endamên Sendîkaya Karkerên Rê, Înşaet û Avahiyan ên Şoreşger (DEV-YAP) ku li şantiyeya Navenda Fînansê ya Stenbolê dixebitin, ev du meh in muçeyên xwe negirtine. Karkeran ji bo vê yekê protesto bikin li ber Emlak Konut GYO çalakî li dar xistin. Namzeta parlamenteriyê ya Partiya Çepên Kesk a Stenbolê Kezban Konukçu jî piştgirî da karkeran.
Karker bi berzkirina dirûşmeyan meşiyan û polîsan li ber Emlak Konut GYO ew dorpêç kir. Tevî dorpêça polîsan jî karkeran xwest biçin hundirê avahiyê û bi rayedaran re hevdîtin bikin. Li ser vê yekê polîsan mudaxale li karkeran kir û 15 karker û Kezban Konukçu bi lêdanê hatin desteserkirin. (MA)
Serhat News
